Cana-Kaka-Ronaldo, 3 idhujt e tifozëve

Lorik Cana është një prej katër futbollistëve më të dashur në Evropë për tifozët. Në një sondazh të publikuar në sitin e njohur "goal.com", mesfushori i kombëtares shqiptare ka marrë të njëjtën notë me Rikardo Kaka, Kristiano Ronaldo, Lionel Mesi dhe Serxho Aguero. Një vlerësim tepër i madh për futbollistin kuqezi, kapiteni i skuadrës më të madhe në Francë, Olimpik i Marsejës. Në fakt, Cana ka qenë gjithnjë një prej më të adhuruarve nga tifozët dhe kjo për shkak të karakterit të tij luftarak. Natyrisht që secili nga pesëshja kryesore e sondazhit, ka qenë lider në ekipin e tij. Duke nisur nga Kaka te Milani, Kristiano Ronaldo te Mançester Junajtid, Serxho Aguero tek Atletiko e Madridit dhe Lionel Mesi te Barcelona. Edhe pse katalanasit kanë kaluar një sezon tepër të dobët, talenti argjentinas ka qenë gjithnjë i duartrokitur në fushën e lojës nga tifozët e këtij ekipi. Ndërsa në "Velodrome", Lorik Cana ka qenë gjithnjë një prej lojtarëve më të adhuruar, sidomos përsa i përket shpirtit që ai vendos në fushë në çdo ndeshje. Në rang-listën e "goal.com", Cana ka lënë pas emra si Stiven Xherard, Hakan Shukur, David Vija apo edhe spanjolli i Liverpulit Fernando Torres.